ନିଶାରେ ବିଦ୍ୟୁତ୍ ଖୁଣ୍ଟରେ ଚଢି ତାର ଉପରେ ଶୋଇପଡିଲେ ଯୁବକ
ନୂଆଦିଲ୍ଲୀ: କୁହାଯାଏ, ମଦ୍ୟପାନ କରିବା ପରେ ମନୁଷ୍ୟ ନିଜର ହିତାହିତ ଜ୍ଞାନ ହରାଇ ବସେ । ସାଧାରଣତଃ ମଣିଷ ମଦ୍ୟପାନ କରିବା ପରେ କେତେବେଳେ ରାସ୍ତାରେ ତ ଆଉ କେତେବେଳେ ଅଳିଆ ଗଦାରେ ଶୋଇଥିବା ଦେଖିବାକୁ ମିଳେ । କିନ୍ତୁ ଆନ୍ଧ୍ର ପ୍ରଦେଶ ଏବଂ ଓଡ଼ିଶା ସୀମାନ୍ତ ପାର୍ବତୀପୁରମ୍ ପଞ୍ଚାୟତର ଏମ୍.ସିଙ୍ଗାପୁରମ୍ ଅଞ୍ଚଳରେ ଜଣେ ଯୁବକ ମଦ୍ୟପାନ କରିବା ପରେ ନିଶାରେ ବିଦ୍ୟୁତ୍ ଖୁଣ୍ଟରେ ଚଢି ତାର ଉପରେ ଶୋଇଥିବା ଦେଖିବାକୁ ମିଳିଛି । ଏହାର ଭିଡିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି, ଯାହାକୁ ଦେଖି ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି ।
ଜିରୋ ନାଇଟ ସେଲିବ୍ରେସନ କରିବା ପାଇଁ ଜଣେ ଯୁବକ ପ୍ରବଳ ମଦ୍ୟପାନ କରିଥିଲେ । ପରେ ସେ ନିଶାରେ ପୁରା ଚୁର୍ ହୋଇଯାଇଥିଲେ । ତେବେ ଏତିକିରେ ମଧ୍ୟ ମନ ଭରି ନ ଥିଲା ଯେ, ପୁଣି ଘରକୁ ଯାଇ ଟଙ୍କା ମାଗିଥିଲେ। ତେବେ ପରିବାର ଲୋକେ ନ ଦେବା କାରଣରୁ ସେ ରାଗିଯାଇ ବିଦ୍ୟୁତ ଖୁଣ୍ଡ ଉପରକୁ ଚଢିଯାଇଥଲେ । ଏହାପରେ ତାର ଉପରେ ହିଁ ଗୋଡ ଲମ୍ବାଇ ଶୋଇପଡିଥିଲେ । ହାତ ଗୋଡ ସିଧା କରି ନିଜ ଘର ଖଟରେ ଶୋଇଲା ଭଳି ଶୋଇପଡିଲେ । ତେବେ ତାଙ୍କୁ ଏତେ ନିଶା ହୋଇଥିଲା ଯେ, ସେ କଣ କରୁଛନ୍ତି ତାହା ମଧ୍ୟ ଜାଣପାରି ନ ଥିଲେ ।
ଏଭଳି ଭାବେ ୮ ଘଣ୍ଟା ଶୋଇ ରହିଥିଲେ। ଗ୍ରାମବାସୀ ବୁଝାଇ ବୁଝାଇ ନାକେଦମ ହୋଇପଡିଥିଲେ ହେଁ ସେ ଶୁଣି ନ ଥିଲେ । ପରେ ସ୍ଥାନୀୟ ପ୍ରଶାସନର ସହଯୋଗ କ୍ରମେ ଟ୍ରାନ୍ସଫରମର ବନ୍ଦ କରାଯାଇଥିଲା । ବ୍ୟକ୍ତିଜଣକ ଆପେ ଆପେ ତଳକୁ ଚାଲିଆସିଥିଲେ ।
