ଚୀନରେ ବୈଜ୍ଞାନିକଙ୍କ ସଫଳତା : ଦୁଇ ପୁରୁଷ ଜନ୍ମ କରିପାରିବେ ସନ୍ତାନ
ନୂଆଦିଲ୍ଲୀ: ଏଣିକି ଦୁଇ ପୁରୁଷ ଜନ୍ମ କରିପାରିବେ ସନ୍ତାନ । ଜଣେ ମହିଳାଙ୍କ ବିନା ଏହା ସମ୍ଭବ । ଏପରି ଯୁକ୍ତି ବାଢିଛନ୍ତି ଚୀନର ବୈଜ୍ଞାନିକମାନେ । କିନ୍ତୁ କେବେ ଏନେଇ କୌଣସି ରିସର୍ଚ୍ଚ ବା ଅଧ୍ୟୟନରୁ ଏହା ଜଣାପଡିନି। ନିକଟରେ ଚାଇନାରେ ଏକ ବିରଳ ରିସର୍ଚ୍ଚ କରାଯାଇଛି । ଯେଉଁଥିରେ ବୈଜ୍ଞାନିକମାନେ ଦୁଇ ପୁରୁଷ ମୂଷାଙ୍କ ମିଳନରୁ ଏକ ମୂଷା ସନ୍ତାନ ଜନ୍ମ ହୋଇଥିବା ଦାବି କରିଛନ୍ତି।
ଚୀନ ଏକାଡେମୀ ଅଫ୍ ସାଇନ୍େସସ୍ (ସିଏଏସ)ର ଆଣବିକ ଜୀବବିଜ୍ଞାନୀ ଜି କୁନ୍ ଲିଙ୍କ ନେତୃତ୍ୱରେ ଚୀନ୍ ଗବେଷକଙ୍କ ଏକ ଦଳଏହି ଦଳ ପରୀକ୍ଷଣ କରିଛନ୍ତି । ଏହା ପ୍ରଥମ ଥର ନୁହେଁ ଯେ ବୈଜ୍ଞାନିକମାନେ ଦୁଇ ପୁରୁଷଙ୍କ ମିଳନରୁ ସନ୍ତାନ ଜନ୍ମ କରିବାକୁ ଚେଷ୍ଟା କରିଛନ୍ତି । ୨୦୨୩ ମସିହାରେ ଜାପାନର ବୈଜ୍ଞାନିକମାନେ ସମାନ କାର୍ଯ୍ୟ କରିଥିଲେ, କିନ୍ତୁ ଦୁଇ ପୁରୁଷ ମୂଷାଙ୍କ ମିଳନରୁ ଜନ୍ମିତ ମୂଷାର ଆୟୁଷ ବହୁତ କମ ଥିଲା ।
ପୁରୁଷ ଷ୍ଟେମ୍ କୋଷରୁ ଡିମ୍ବାଣୁ ସୃଷ୍ଟି କରିବାର ପୂର୍ବ ପ୍ରୟାସ ବିଫଳ ହୋଇଛି । ଯଦିଓ ସରୋଗେସି ମାଧ୍ୟମରେ କୌଣସି ଜୈବିକ ମା ବିନା ସନ୍ତାନ ପାଇବାର ଏକ ଉପାୟ ଅଛି, କିନ୍ତୁ ଏହି ପ୍ରକ୍ରିୟାରେ ଅନେକ ଚ୍ୟାଲେଞ୍ଜ ଜଡିତ । ଚୀନରେ ହୋଇଥିବା ଏହି ଐତିହାସିକ ପରୀକ୍ଷଣରୁ ଜନ୍ମିତ ମୂଷାମାନେ ଯଦିଓ ସ୍ୱାଧୀନ ଭାବରେ ପ୍ରଜନନ କରିପାରୁନାହାଁନ୍ତି, ତଥାପି ସେମାନଙ୍କର ସ୍ୱାସ୍ଥ୍ୟ ଅନ୍ୟ ସମାନ ପ୍ରାଣୀମାନଙ୍କ ତୁଳନାରେ ଭଲ । ସେମାନଙ୍କଠାରେ କୌଣସି ସ୍ୱାସ୍ଥ୍ୟ ସମସ୍ୟା ଦେଖାଯାଉ ନାହିଁ । ଏହା ମନେ ରଖିବା ଗୁରୁତ୍ୱପୂର୍ଣ୍ଣ ଯେ, ଏହି ଅଧ୍ୟୟନରେ ମୂଷାଙ୍କ ଭାଇଭଉଣୀମାନଙ୍କ ମଧ୍ୟରୁ ଅଧା ପ୍ରାପ୍ତବୟସ୍କ ହେବା ପର୍ଯ୍ୟନ୍ତ ଜୀବିତ ନଥିଲେ ଏବଂ ପ୍ରାୟ ୯୦% ଭ୍ରୁଣ ବଞ୍ଚି ପାରି ନଥିଲେ । ଏହି କୌଶଳକୁ ମଣିଷଙ୍କ ଉପରେ ପ୍ରୟୋଗ କରିବା ପୂର୍ବରୁ ସଫଳତା ହାରରେ ଯଥେଷ୍ଟ ଉନ୍ନତି ଆଣିବାକୁ ପଡିବ ।
ତଥାପି ବୈଜ୍ଞାନିକମାନେ ବିଶ୍ୱାସ କରନ୍ତି ଯେ, ସେମାନଙ୍କର କାର୍ଯ୍ୟ ମଣିଷଙ୍କ ମଧ୍ୟରେ କିଛି ଜେନେଟିକ୍ ମାନସିକ ବିକାରକୁ ଭଲ ଭାବରେ ବୁଝିବାରେ ସହାୟକ ହେବ । ଏହାକୁ ମଣିଷ ଉପରେ ପ୍ରୟୋଗ କରିବା ପୂର୍ବରୁ ଅନେକ ଚ୍ୟାଲେଞ୍ଜକୁ ଦୂର କରିବାକୁ ପଡିବ । ଏହି ଗବେଷଣା ଭବିଷ୍ୟତର ପ୍ରଜନନ ପ୍ରଯୁକ୍ତିବିଦ୍ୟାକୁ ଏକ ନୂତନ ଦିଗଦର୍ଶନ ଦେଇପାରିବ ଏବଂ ପାରମ୍ପରିକ ପଦ୍ଧତିରେ ସନ୍ତାନ ଜନ୍ମ କରିବାକୁ ଅସମର୍ଥ ଲୋକଙ୍କ ପାଇଁ ଆଶାର କିରଣ ହୋଇପାରିବ ।
