କେଉଁଠି ପଢନ୍ତି ବିଗ୍ ବିଙ୍କ ନାତୁଣୀ : ଜାଣନ୍ତୁ ତାଙ୍କର ମାସିକ ସ୍କୁଲ ଫି’
ମୁମ୍ବାଇ: ବିଭିନ୍ନ କାରଣ ପାଇଁ ପ୍ରାୟତଃ ଚର୍ଚ୍ଚାରେ ରହିଥା’ନ୍ତି ବଲିଉଡ଼ ଅଭିନେତା ବିଗ୍ ବି ଅମିତାଭ ବଚ୍ଚନଙ୍କ ନାତୁଣୀ ଆରାଧ୍ୟା ବଚ୍ଚନ । କେଶ ସଜ୍ଜା ହେଉ କି ବେଶ ପୋଷାକ, ସବୁବେଳେ ଆରାଧ୍ୟାଙ୍କୁ ନେଇ ଲାଗି ରହିଥାଏ ଚର୍ଚ୍ଚା । ଫିଲ୍ମ ନ କରି ବି ସେ ଲୋକପ୍ରିୟ ଷ୍ଟାର କିଡମାନଙ୍କ ମଧ୍ୟରୁ ଜଣେ। ଆରାଧ୍ୟା କେଉଁ ସ୍କୁଲରେ ପଢନ୍ତି ଓ ତାଙ୍କର ସ୍କୁଲ ଫି କେତେ ଜାଣିଲେ ଆପଣଙ୍କ ହୋସ୍ ଉଡ଼ିଯିବ ।
ବଲିଉଡର ଲୋକପ୍ରିୟ ଅଭିନେତ୍ରୀ ଐଶ୍ୱର୍ଯ୍ୟା ରାୟ ବଚ୍ଚନ ଏବଂ ଅଭିନେତା ଅଭିଷେକ ବଚ୍ଚନଙ୍କ ଝିଅ ଆରାଧ୍ୟା । ସେ ଅଧିକାଂଶ ସମୟ ଐଶ୍ୱର୍ଯ୍ୟାଙ୍କ ସହିତ ନଜର ଆସନ୍ତି। ସବୁ କାର୍ଯ୍ୟକ୍ରମରେ ଆରାଧ୍ୟା, ମା’ ଐଶ୍ୱର୍ଯ୍ୟାଙ୍କ ସହ ନଜର ଆସୁଥିବାରୁ ଝିଅ ସ୍କୁଲ ଯାଉଛି କି ନାହିଁ ବୋଲି ଫ୍ୟାନ୍ସଙ୍କ ମନରେ ପ୍ର୍ଶ୍ନ ଉଙ୍କିମାରେ । ଏବେ ଆରାଧ୍ୟାଙ୍କ ସ୍କୁଲର ବାର୍ଷିକ ଉତ୍ସବର ଭିନ୍ନ ଭିନ୍ନ ଫଟୋ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ସେଥିମଧ୍ୟରେ ଆରାଧ୍ୟା ଅଭିନୟ କରିଥିବା ନାଟକର ଫଟୋ ମଧ୍ୟ ରହିଛି। ତେବେ ବଚ୍ଚନ ପରିବାର ଅଲିଅଳି ଝିଅ କେଉଁ ଶ୍ରେଣୀରେ ପଢ଼ୁଛନ୍ତି ଓ ସ୍କୁଲ ଫି’ କେତେ ବୋଲି ସମସ୍ତେ ଜାଣିବାକୁ ଚାହାନ୍ତି।
ଐଶ୍ୱର୍ଯ୍ୟା ଏବଂ ଅଭିଷେକଙ୍କ ଝିଅ ଆରାଧ୍ୟା ମୁମ୍ବାଇର ଲୋକପ୍ରିୟ ଧୀରଭାଇ ଅମ୍ବାନୀ ଅନ୍ତର୍ଜାତୀୟ ବିଦ୍ୟାଳୟରେ ପଢନ୍ତି। ଅନେକ ଷ୍ଟାର୍ କିଡ୍ମାନେ ଏହି ବିଦ୍ୟାଳୟରେ ପଢୁଛନ୍ତି । ଆରାଧ୍ୟା ଏଠାରେ ନର୍ସରୀରୁ ପଢ଼ୁଛନ୍ତି। ବର୍ତ୍ତମାନ ସେ ଅଷ୍ଟମ ଶ୍ରେଣୀରେ ପଢ଼ୁଛନ୍ତି । ଏହି ବିଦ୍ୟାଳୟର ଫି’ ଜାଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ। ପ୍ରତି ମାସରେ ତାଙ୍କର ସ୍କୁଲ ଫି’ ରହିଛି ୪.୫ ଲକ୍ଷ ଟଙ୍କା । ଏହି ସ୍କୁଲରେ ନର୍ସରୀରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ପଢ଼ିଲେ ମାସକୁ ୧.୭୦ଲକ୍ଷ ଟଙ୍କା ଦେବାକୁ ପଡ଼େ।
