ଯୁବକ ଉଡ଼ାଇଲେ ପୁଳା ପୁଳା ଟଙ୍କା, ପୋଲିସ କଲା ଗିରଫ
ହାଇଦ୍ରାବାଦ: ଆଜିକାଲି ଯୁବପିଢି ସୋସିଆଲ ମିଡ଼ିଆରେ ଲୋକପ୍ରିୟ ହେବା ପାଇଁ କୌଣସି ବି କାମ କରିବାକୁ ପଛାଉ ନାହାନ୍ତି । ଏମିତି କି ନିଜ ଜୀବନକୁ ବାଜି ଲଗାଇ ଭିଡ଼ିଓ ବନାଉଛନ୍ତି । କିଏ ଖୁଣ୍ଟ ଉପରେ ଚଢ଼ି ଷ୍ଟଣ୍ଟ୍ କରୁଛି, ରାସ୍ତାରେ ଓ ମେଟ୍ରୋରେ ରିଲ୍ସ କରୁଛି ତ ପୁଣି କିଏ ଅଜବ ଗଜବ କାରନାମା କରୁଛନ୍ତି । ନିକଟରେ ଜଣେ ଯୁବକ ଜାତୀୟ ରାଜପଥରେ ପୁଳା ପୁଳା ଟଙ୍କା ଉଡ଼ାଇବା ମହଙ୍ଗା ପଡ଼ିଛି । ଏହାର ଏକ ଭିଡ଼ିଓ ଏବେ ଭାଇରାଲ ହେବାରେ ଲାଗିଛି, ଯାହାକୁ ଦେଖି ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି ।
ହାଇଦ୍ରାବାଦର ଜଣେ ଯୁବକ କଣ୍ଟେଣ୍ଟ କ୍ରିଏଟର ଭାବେ କାମ କରନ୍ତି । ନିକଟରେ ସେ ଭିଡ଼ିଓ କରିବା ପାଇଁ କିଛି ଟଙ୍କା ରାସ୍ତାରେ ଉଡ଼ାଇଥିଲେ । ଏହାକୁ ସେ ‘ମନି ହଣ୍ଟ୍’ ଚ୍ୟାଲେଞ୍ଜ ନାଁ ଦେଇଥିଲେ । ସେ ଘୋଷଣା ମାଧ୍ୟମରେ ଲୋକଙ୍କୁ ଟଙ୍କା ସଂଗ୍ରହ କରିବା ପାଇଁ ଚ୍ୟାଲେଞ୍ଜ ଦେଇଥିଲେ । ଏହା ପରେ ସବୁ ଟଙ୍କା ସଂଗ୍ରହ କରିବା ପାଇଁ ରାସ୍ତାରେ ଲୋକଙ୍କ ଭିଡ଼ ଜମିଥିଲା । ଏମିତି କି ଟ୍ରାଫିକ୍ ଜାମ ହେଲା । ଫଳରେ ଯାତାୟାତ ବାଧାପ୍ରାପ୍ତ ହୋଇଥିଲା । ଯୁବକଙ୍କ ଏଭଳି ଉଦ୍ୟମ ସୋସିଆଲ ମିଡିଆରେ ଭାଇରାଲ ହେବା ପରେ ପୋଲିସ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ପୋଲିସ ଘଟଣାସ୍ଥଳରେ ପହଞ୍ଚି ଉକ୍ତ ଯୁବକଙ୍କୁ ଗିରଫ କରିଥିଲା ।
ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ଯୁବକ ଜଣକ ନିଜ ପାଖରେ ଥିବା ୨୦ ହଜାର ଟଙ୍କା ଆଉଟର ରିଙ୍ଗ୍ ରୋଡରେ ଉଡ଼ାଉଛନ୍ତି । ତେବେ ରାସ୍ତାରେ ଉଡ଼ାଯାଇଥିବା ଟଙ୍କା ଜାଣି ଲୋକେ ତାହାକୁ ଗୋଟାଇବା ଆରମ୍ଭ କରିଥିଲେ । ଫଳରେ ରାସ୍ତା ଜାମ୍ ହୋଇଯାଇଥିଲା । ଭିଡ଼ ଅଣାୟତ ହେବାରୁ ପୋଲିସ ଘଟଣାସ୍ଥଳରେ ପହଞ୍ଚି ଭିଡ଼କୁ ନିୟନ୍ତ୍ରଣ କରିଥିଲା । ପରେ ଉକ୍ତ ଯୁବକଙ୍କୁ ଧରି ଥାନାକୁ ନେଇଥିଲା ।
