ଭୟାବହ ଅଗ୍ନିକାଣ୍ଡ: ସର୍ବସ୍ୱାନ୍ତ ହୋଇଗଲା ପରିବାର

ରାଜକନିକା: କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଲକ ଖୁଣ୍ଟା ଗାଁରେ ଭୟାବହ ଅଗ୍ନିକାଣ୍ଡ । ଫଳରେ ଗ୍ରାମର ବିଶ୍ୱମ୍ବର ଜେନା ସର୍ବସ୍ୱାନ୍ତ ହୋଇଯାଇଛନ୍ତି । ଅଗ୍ନିକାଣ୍ଡରେ ୨୯ଟି ଛେଳି, ୧୫ଟି କୁକୁଡ଼ା ଓ ଗୋଟିଏ ଗାଈ ଜୀବନ୍ତ ଦଗ୍ଧ ହୋଇଯାଇଛନ୍ତି । ଖବରପାଇ ଦମକାଳବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା ।

ବିଶ୍ୱମ୍ବରଙ୍କ ପରିବାର ଛେଳି କୁକୁଡ଼ା ଓ ଗାଈ ରଖି ଚଳୁଥିଲେ । ହେଲେ ରବିବାର ବିଳମ୍ବିତ ରାତିରେ ଅଗ୍ନିକାଣ୍ଡ ଘଟି ଘରେ ଥିବା ୨୯ଟି ଛେଳି, ୧୫ଟି କୁକୁଡ଼ା ଓ ଗୋଟିଏ ଗାଈ ଜୀବନ୍ତ ଦଗ୍ଧ ହୋଇଯାଇଛନ୍ତି । ବିଶ୍ୱମ୍ବର ଜଣେ ପକ୍ଷାଘାତ ରୋଗୀ, ପତ୍ନୀ ମଇନା ଜେନା ଏହି ଛେଳି, କୁକୁଡ଼ା ଓ ଗାଈ ରଖି ପରିବାର ଚଳାଇଥାନ୍ତି ।ଧାର କରଜ କରି ଛେଳି କିଣିଥିଲେ । ଏବେ ଏହି ଗରିବ ପରିବାର ସର୍ବସ୍ୱାନ୍ତ ହୋଇଯାଇଛନ୍ତି । ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଗାଁ ଲୋକମାନେ ଦାବି କରିଛନ୍ତି । ଅଗ୍ନିକାଣ୍ଡଟି ବିଦ୍ୟୁତ ସର୍ଟ ସର୍କିଟ କାରଣରୁ ହୋଇଥିବା ନେଇ ସନ୍ଦେହ କରାଯାଉଛି ।