ଜୀବନ ବଞ୍ଚାଇଥିବା ଅଟୋ ଡ୍ରାଇଭରଙ୍କୁ ଭେଟିଲେ ସୈଫ୍
ମୁମ୍ବାଇ: ଅଭିନେତା ସୈଫ ଅଲ୍ଲୀ ଖାନଙ୍କ ସ୍ୱାସ୍ଥ୍ୟାବସ୍ଥା ସୁଧୁରିଛି। ସେ ହସ୍ପିଟାଲରୁ ଡିସଚାର୍ଜ ମଧ୍ୟ ହୋଇଛନ୍ତି। ସୈଫ ହସ୍ପିଟାଲରୁ ଘରକୁ ଫେରିବା ପରେ ବିପଦ ବେଳେ ସାହାଯ୍ୟ କରିଥିବା ଅଟୋ ଡ୍ରାଇଭରଙ୍କୁ ଭେଟିଛନ୍ତି । ଅଟୋ ଡ୍ରାଇଭର ଭଜନ ସିଂହ ରାଣାଙ୍କ ସହ ସୈଫଙ୍କ ସାକ୍ଷାତ ସମୟର ଫଟୋ ସୋସିଆଲ ମିଡ଼ିଆରେ ଭାଇରାଲ ହେଉଛି। ଫଟୋରେ ସୈଫ ଧଳା ସାର୍ଟ ଏବଂ ଜିନ୍ସ ପିନ୍ଧିଥିବାର ଦେଖାଯାଉଛି। ସେ ମଧ୍ୟ କଳା ଚଷମା ପିନ୍ଧିଛନ୍ତି। ସୈଫ ଡ୍ରାଇଭରଙ୍କ କାନ୍ଧରେ ହାତ ରଖିଥିବା ଦେଖିବାକୁ ମିଳିଛି ।
ସୈଫ ଅଟୋ ଡ୍ରାଇଭରଙ୍କୁ ଭେଟି ଧନ୍ୟବାଦ ଜଣାଇଥିଲେ। ଏହି ସମୟରେ ସୈଫ ଅଲ୍ଲୀ ଖାନଙ୍କ ମା’ ଶର୍ମିଲା ଟାଗୋର ମଧ୍ୟ ଉପସ୍ଥିତ ଥିଲେ। ସେ ଅଟୋ ଡ୍ରାଇଭରଙ୍କ ପ୍ରତି କୃତଜ୍ଞତା ମଧ୍ୟ ପ୍ରକାଶ କରିଥିଲେ ଏବଂ ତାଙ୍କୁ ସବୁବେଳେ ଅନ୍ୟମାନଙ୍କୁ ସାହାଯ୍ୟ କରିବାକୁ ଉତ୍ସାହିତ କରିଥିଲେ। ସୈଫ ଅଲ୍ଲୀ ଖାନ ରିକ୍ସା ଡ୍ରାଇଭରଙ୍କ କାମକୁ ପ୍ରଶଂସା କରିଥିଲେ। ସୈଫ କହିଥିଲେ, ସମସ୍ତଙ୍କୁ ଏହିପରି ସାହାଯ୍ୟ କରିଚାଲ। ଯଦି ତୁମକୁ ଜୀବନରେ କୌଣସି ପ୍ରକାରର ସାହାଯ୍ୟର ଆବଶ୍ୟକତା ଅଛି, ତେବେ ମୋତେ ମନେ ପକାଇବ।
ସୈଫ ଅଲ୍ଲୀ ଖାନଙ୍କ ଉପରେ ଜଣେ ଚୋର ଆକ୍ରମଣ କରିଥିଲା। ଜଣେ ଚୋର ସେମାନଙ୍କ ଘରେ ପଶି ଆସିଥିଲା। ଚୋର ଜଣଙ୍କ ସୈଫଙ୍କ ଉପରେ ଛଅ ଥର ଆକ୍ରମଣ କରିଥିଲେ। ସୈଫ ରକ୍ତରେ ଜୁଡୁବୁଡୁ ହୋଇଯାଇଥିଲେ। ସେ ଅଟୋ ଯୋଗେ ଲୀଳାବତୀ ହସ୍ପିଟାଲରେ ପହଞ୍ଚିଲେ। ସେତେବେଳେ ସୈଫଙ୍କ ଘରେ କୌଣସି ଡ୍ରାଇଭର ନ ଥିଲେ। ସେଥିପାଇଁ ସେ ଏକ ଅଟୋର ସହାୟତା ନେଇଥିଲେ। ଭଜନ ସିଂହ ରାଣା ନିଜେ ସୈଫ ଏବଂ ତାଙ୍କ ପୁଅ ତୈମୁରଙ୍କୁ ତାଙ୍କ ଅଟୋରେ ହସ୍ପିଟାଲକୁ ନେଇ ଯାଇଥିଲେ।
