ପ୍ରକୃତ କୁମ୍ଭ ମାଘରେ ସରିଛି, ଏବେ ଯାଏ ଚାଲିଥିଲା ସରକାରୀ କୁମ୍ଭ
ନୂଆଦିଲ୍ଲୀ: ପ୍ରକୃତି କୁମ୍ଭ ମାଘରେ ହିଁ ସରିଯାଇଛି । ଏବେ ଯେଉଁ କୁମ୍ଭ ଚାଲିଥିଲା ତାହା ହେଉଛି ସରକାରୀ କୁମ୍ଭ । ଏଭଳି ବିବାଦୀୟ ବୟାନ ଦେଇଛନ୍ତି ଜ୍ୟୋର୍ତିମଠ ପୀଠ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ । ମାଘ ମାସର ପୂର୍ଣ୍ଣିମା ଦିନ କୁମ୍ଭ ସମାପ୍ତ ହୋଇଛି ବୋଲି ସେ କହିଛନ୍ତି ।
ଉତ୍ତର ପ୍ରଦେଶର ପ୍ରୟାଗରାଜରେ ଗତ ଜାନୁଆରୀ ୧୩ ତାରିଖରୁ ଆରମ୍ଭ ହୋଇଥିବା ମହାକୁମ୍ଭ ଗତ ୨୬ ତାରିଖରେ ଶେଷ ହୋଇଛି। ଏହି ସମୟ ମଧ୍ୟରେ ତ୍ରିବେଣୀ ସଙ୍ଗମରେ ୬୬ କୋଟିରୁ ଊର୍ଦ୍ଧ୍ୱ ଶ୍ରଦ୍ଧାଳୁ ବୁଡ଼ ପକାଇଛନ୍ତି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏ ସମ୍ପର୍କରେ ସୂଚନା ଦେଇଛନ୍ତି। ତେବେ ଏହାକୁ ନେଇ ବିବାଦୀୟ ବୟାନ ଦେଇଛନ୍ତି ଜ୍ୟୋର୍ତିମଠ ପୀଠ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ । ମହାକୁମ୍ଭ କାର୍ଯ୍ୟକ୍ରମକୁ ଏକ ସରକାରୀ କାର୍ଯ୍ୟକ୍ରମ ଭାବରେ ବର୍ଣ୍ଣନା କରିଛନ୍ତି। ସେ କହିଛନ୍ତି, ପ୍ରକୃତ କୁମ୍ଭ ପୂର୍ଣ୍ଣିମା ଦିନ ହିଁ ଶେଷ ହୋଇସାରିଛି। କୁମ୍ଭ କେବଳ ମାଘ ମାସରେ ହୁଏ ଯାହା ପୂର୍ଣ୍ଣିମାରେ ସମାପ୍ତ ହୁଏ। ଏବେ, ସେଠାରେ ଯାହା ଚାଲିଛି ତାହା ଏକ ସରକାରୀ କୁମ୍ଭ। ମାଘ ମାସର ପୂର୍ଣ୍ଣିମା ଦିନ ସମସ୍ତ ‘କଳ୍ପବାସୀ’ ସେଠାରୁ ଚାଲିଯାଇଥିଲେ, ସେତେବେଳେ କୁମ୍ଭ ସମାପ୍ତ ହୋଇଥିଲା।
ଗୋ ମାତାକୁ ରାଷ୍ଟ୍ରମାତାର ମାନ୍ୟତା ଦେବା ଏବଂ ଗୋ ସୁରକ୍ଷା ପାଇଁ ଏକ ଆଇନ ପ୍ରଣୟନ କରିବା ପାଇଁ ସନ୍ଥ ସମ୍ପ୍ରଦାୟ ଏକ ବଡ଼ ଆନ୍ଦୋଳନ ଆରମ୍ଭ କରିଛନ୍ତି। ଶଙ୍କରାଚାର୍ଯ୍ୟ କହିଛନ୍ତି ଯେ ଦେଶର ସମସ୍ତ ରାଜନୈତିକ ଦଳ ଏବଂ ସରକାର ୧୭ ମାର୍ଚ୍ଚ ସୁଦ୍ଧା ଗାଈ ସମ୍ପର୍କରେ ସେମାନଙ୍କର ମତ ସ୍ପଷ୍ଟ କରିବା ଉଚିତ। କହିରଖୁଛୁ କି, ମହାକୁମ୍ଭର ଶେଷଦିନ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୋସିଆଲ ମିଡ଼ିଆରେ ପୋଷ୍ଟ କରି ଲେଖିଛନ୍ତି ଯେ ମାନବତାର ମହାନ ବଳିଦାନ, ବିଶ୍ୱାସ, ଏକତା ଏବଂ ସମାନତାର ମହାନ ପର୍ବ, ମହାକୁମ୍ଭ, ପ୍ରୟାଗରାଜ ମହାଶିବରାତ୍ରିର ପବିତ୍ର ସ୍ନାନ ସହିତ ଏହାର ସମାପ୍ତି ଆଡକୁ ଅଗ୍ରସର ହେଉଛି।
