ମହିଳା ବେଶରେ ଲିଫ୍ଟ ଦେଇ ପୁରୁଷଙ୍କୁ କରୁଥିଲେ ଲୁଟ,ପରେ ହତ୍ୟା
ଚଣ୍ଡୀଗଡ଼: ମୁହଁରେ ନେଉଥିଲେ ମେକଅପ୍ । ଆଖିରେ କଜଳ ସାଙ୍ଗକୁ ଓଠରେ ଲଗାଉଥିଲେ ଲାଲ ଲିପଷ୍ଟିକ । ଆଉ ଶାଢି ପିନ୍ଧିବା ସହ ବୋଲଡ଼ ଲୁକରେ ଯୁବକଙ୍କୁ ଲିଫ୍ଟ ଦେଉଥିଲେ । ପରେ ଲୁଟ୍ କରୁଥିଲେ । ଯଦି କେହି ପ୍ରତିବାଦ କଲା, ନେଇଯାଉଥିଲେ ଜୀବନ । ଏମିତି ଜଣେ ସିରିୟଲ କିଲରକୁ ଧରିବାରେ ସକ୍ଷମ ହୋଇଛି ପୋଲିସ । ଆଉ ତା ମୁହଁରୁ ଟିକିନିକି ଘଟଣା ଜାଣିବା ପରେ ଚକିତ ହୋଇପଡ଼ିଛି ପୋଲିସ ।
ଏହି ସିରିଏଲ କିଲର ରାମ ସ୍ୱରୂପଙ୍କୁ ପଞ୍ଜାବର ରୁପନଗରରୁ ପୋଲିସ ଗିରଫ କରିଛି । ପଚରାଉଚରା ବେଳେ ଏକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି । ସିରିଏଲ କିଲର ରାମସ୍ୱରୂପ କହିଛନ୍ତି ଯେ, ସେ ତାଙ୍କ ଶରୀର ଏବଂ ପରିଚୟ ବିଷୟରେ ଅପମାନ ଗ୍ରହଣ କରିପାରିବେ ନାହିଁ। ତାଙ୍କର ଶେଷ ହତ୍ୟା ଘଟଣା ଏହିପରି ମନ୍ତବ୍ୟ ସହିତ ସିଧାସଳଖ ଜଡିତ ଥିଲା। ତାଙ୍କର ଆବେଗିକ ଦୁଃଖ ତାଙ୍କୁ ଅପରାଧ କରିବାକୁ ପ୍ରେରିତ କରିଛି । ଗତ ୧୮ ମାସ ମଧ୍ୟରେ ଅତି କମରେ ୧୧ ଜଣଙ୍କୁ ହତ୍ୟା କରିଛନ୍ତି। ସେ ମହିଳା ବେଶରେ ପୁରୁଷମାନଙ୍କୁ ପ୍ରଲୋଭିତ କରୁଥିଲେ । ସେ ତାଙ୍କ କାରରେ ଲିଫ୍ଟ ଦେଉଥିଲେ ଏବଂ ପରେ ତାଙ୍କୁ ଲୁଟି ନେଇ ହତ୍ୟା କରୁଥିଲେ ।
ଏହି ହତ୍ୟା ମାମଲାରେ ସମ୍ପୃକ୍ତ ଅନ୍ୟ ଅପରାଧୀଙ୍କୁ ଧରିବା ପାଇଁ ପୋଲିସ ଏକ ଟିମ୍ ଗଠନ କରିଛି । ତଦନ୍ତରେ ରାମସ୍ୱରୂପଙ୍କୁ ଗିରଫ କରାଯାଇଥିଲା ଏବଂ ପରେ ପଚରାଉଚରା ବେଳେ ଅନ୍ୟ ମାମଲାରେ ତାଙ୍କର ସମ୍ପୃକ୍ତି ଥିବା ଜଣାପଡିଥିଲା। ପଚରାଉଚରା ବେଳେ ଅଭିଯୁକ୍ତ ସ୍ୱୀକାର କରିଛନ୍ତି ଯେ ଏହି ମାମଲା ବ୍ୟତୀତ ସେ ଆହୁରି ୧୦ ଜଣଙ୍କୁ ହତ୍ୟା କରିଛନ୍ତି।
