ଗ୍ୱାଦର ଅନ୍ତର୍ଜାତୀୟ ବିମାନବନ୍ଦର: ଏଠାକୁ ଆସୁନାହାନ୍ତି ଯାତ୍ରୀ କି ବିମାନ
ଲାହୋର: ଚର୍ଚ୍ଚାରେ ପାକିସ୍ତାନର ନୂତନ ଏବଂ ସବୁଠାରୁ ମହଙ୍ଗା ଗ୍ୱାଦର ଅନ୍ତର୍ଜାତୀୟ ବିମାନବନ୍ଦର। ଏହି ବିମାନବନ୍ଦରଟି ନିର୍ମାଣ ଶେଷ ହେବାର ୫ ମାସ ବିତିଯାଇଥିଲେ ମଧ୍ୟ ବର୍ତ୍ତମାନ ପର୍ଯ୍ୟନ୍ତ ଏହା କାର୍ଯ୍ୟକ୍ଷମ ହୋଇପାରିନାହିଁ । ଏହି ବିମାନବନ୍ଦରଟି ଯେଉଁଠାରେ ନିର୍ମିତ ହୋଇଛି, ସେଠାକୁ ନା କୌଣସି ଯାତ୍ରୀ ଆସୁଛନ୍ତି ନା କୌଣସି ବିମାନ। ଏହା କେବେ କାର୍ଯ୍ୟକ୍ଷମ ହେବ ସେନେଇ କେହି କିଛି କହି ପାରୁନାହାନ୍ତି ।
ଗ୍ୱାଦର ଅନ୍ତର୍ଜାତୀୟ ବିମାନବନ୍ଦରକୁ ଚୀନ୍ ୨୪୦ ନିୟୁତ ଡଲାର ଖର୍ଚ୍ଚରେ ନିର୍ମାଣ କରିଛି। ପ୍ରାୟ ୪୩୦୦ ଏକର ଜମିରେ ନିର୍ମାଣ ହୋଇଥିବା ଏହି ବିମାନବନ୍ଦରର କାର୍ଯ୍ୟ ୨୦୧୯ ମସିହାରେ ଆରମ୍ଭ ହୋଇ ଅକ୍ଟୋବର ୨୦୨୪ରେ ସମ୍ପୂର୍ଣ୍ଣ ଶେଷ ହୋଇଥିଲା । ପରେ ଏହାକୁ ୨୦ ଜାନୁଆରୀ ୨୦୨୫ରେ ଆନୁଷ୍ଠାନିକ ଭାବରେ ଖୋଲାଯାଇଥିଲା। ନ୍ୟୁ ଗ୍ୱାଦର ଅନ୍ତର୍ଜାତୀୟ ବିମାନବନ୍ଦର ହେଉଛି ଚୀନ-ପାକିସ୍ତାନ ଅର୍ଥନୈତିକ କରିଡରର ଏକ ଅଂଶ । ଏହାର ଉଦ୍ଦେଶ୍ୟ ହେଉଛି ଚୀନର ପଶ୍ଚିମ ଜିନଜିଆଙ୍ଗ ପ୍ରଦେଶକୁ ଆରବ ସାଗର ସହିତ ସଂଯୋଗ କରିବା। ଗ୍ୱାଦରର ଲୋକମାନେ କହୁଛନ୍ତି ଯେ ଏହା କୌଣସି ଗୁରୁତ୍ୱପୂର୍ଣ୍ଣ ଲାଭ ଦେବ ନାହିଁ, ଯେତେବେଳେ ପାକିସ୍ତାନୀ ଅଧିକାରୀମାନେ ଏହାକୁ ଏକ ବଡ଼ ବିକାଶ ବୋଲି କହୁଛନ୍ତି।
ପାକିସ୍ତାନର ବେଲୁଚିସ୍ତାନ ଅଞ୍ଚଳରେ ଅବସ୍ଥିତ ଗ୍ୱାଦର ଅଞ୍ଚଳରେ ବିଦ୍ୟୁତ୍ ଏବଂ ସ୍ୱଚ୍ଛ ପାଣି ଭଳି ମୌଳିକ ଆବଶ୍ୟକତା ନାହିଁ। ପାକିସ୍ତାନ-ଚୀନ୍ ସମ୍ପର୍କର ବିଶେଷଜ୍ଞ ଅଜିମ୍ ଖାଲିଦ କହିଛନ୍ତି ଯେ, ଏହି ବିମାନବନ୍ଦର ପାକିସ୍ତାନ କିମ୍ବା ଗ୍ୱାଦର ପାଇଁ ନୁହେଁ। ଏହା ଚୀନ୍ ପାଇଁ, ଯାହା ଦ୍ୱାରା ସେମାନେ ସେମାନଙ୍କର ନାଗରିକମାନଙ୍କୁ ଗ୍ୱାଦର ଏବଂ ବେଲୁଚିସ୍ତାନରେ ସୁରକ୍ଷିତ ପ୍ରବେଶ ଯୋଗାଇପାରିବେ। ଚୀନ୍ ଶ୍ରମିକ ଏବଂ ଅଧିକାରୀଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଏଠାରେ ପ୍ରାୟତଃ ରାସ୍ତା ବନ୍ଦ ଥାଏ। ଗ୍ୱାଦର ବାସିନ୍ଦା ଖୁଦା ବକ୍ସ ହାସିମ କହିଛନ୍ତି ଯେ ତାଙ୍କୁ ରାସ୍ତାରେ ପରିଚୟ ପଚରାଯାଉଛି। ସେ କହିଲେ, “ଆମକୁ କହିବାକୁ ପଡିବ ଯେ ଆମେ କିଏ, କେଉଁଠାରୁ ଆସୁଛୁ, କେଉଁଠାକୁ ଯାଉଛୁ, କେଉଁଠାରେ ରହୁଛୁ।”
