ଫେସବୁକ ପାଇଁ ୪ ପାକିସ୍ତାନୀଙ୍କୁ ମିଳିଲା ଅଜବ ଦଣ୍ଡ
ଲାହୋର: ପାକିସ୍ତାନରେ ଏକ ଅପରାଧ ପାଇଁ ଚାରି ଜଣଙ୍କୁ ଅଜବ ଦଣ୍ଡ ଦିଆଯାଇଛି। ପାକିସ୍ତାନର ଏକ କୋର୍ଟ ଚାରି ଜଣଙ୍କୁ ମୃତ୍ୟୁଦଣ୍ଡ ଦେବା ସହିତ ୮୦ ବର୍ଷ ଜେଲଦଣ୍ଡାଦେଶ ଶୁଣାଇଛନ୍ତି। ଏହି ରାୟ ଶୁଣିବା ପରେ ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି। ଫେସବୁକରେ ମନ୍ତବ୍ୟ ଦେବା ଯୋଗୁଁ ଏହି ଚାରିଜଣ ବ୍ୟକ୍ତିଙ୍କୁ ମୃତ୍ୟୁ ଦଣ୍ଡ ମିଳିଛି । ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ସେମାନଙ୍କୁ ମୃତ୍ୟୁଦଣ୍ଡ ଦେବା ଏବଂ ପରେ ୮୦ ବର୍ଷ ଜେଲଦଣ୍ଡ ଦେବା କିପରି ସମ୍ଭବ, ସେନେଇ ଅନେକଙ୍କ ମନରେ ପ୍ରଶ୍ନ ।
ଫେସବୁକରେ ଈଶ୍ୱରଙ୍କୁ ନିନ୍ଦା ସମ୍ପର୍କିତ ବିଷୟବସ୍ତୁ ସେୟାର କରିଥିଲେ । ଏହି ଅଭିଯୋଗରେ ପାକିସ୍ତାନର ଏକ କୋର୍ଟ ସମସ୍ତଙ୍କୁ ମୃତ୍ୟୁଦଣ୍ଡ ଦେଇଛନ୍ତି। ସେମାନଙ୍କୁ ୮୦ ବର୍ଷ ଜେଲଦଣ୍ଡ ମଧ୍ୟ ଦିଆଯାଇଛି । ପ୍ରକୃତରେ, ବିଭିନ୍ନ ଧାରା ଅନୁଯାୟୀ ମାମଲା ରୁଜୁ ହେବା ଏବଂ ବିଭିନ୍ନ ଅପରାଧ ପ୍ରମାଣିତ ହେବା ପରେ ଏହି ଦଣ୍ଡ ଦିଆଯାଇଛି, ଯେଉଁଥିରେ ଗୋଟିଏ ମାମଲାରେ ମୃତ୍ୟୁଦଣ୍ଡ ଏବଂ ଅନ୍ୟ ମାମଲାରେ ୮୦ ବର୍ଷ ଜେଲଦଣ୍ଡ ଦିଆଯାଇଛି। ଜଣେ ଅଧିକାରୀ ଏହି ସୂଚନା ଦେଇଛନ୍ତି। ଅତିରିକ୍ତ ସେସନ୍ସ ଜଜ୍ ମହମ୍ମଦ ତାରିକ ଆୟୁବ ଚାରି ଜଣ ସନ୍ଦିଗ୍ଧ – ୱାଜିଦ ଅଲି, ଆହଫାକ ଅଲି ସାକିବ, ରାଣା ଉସମାନ ଏବଂ ସୁଲେମାନ ସାଜିଦଙ୍କୁ ପେଗମ୍ବର ମହମ୍ମଦ ଏବଂ ତାଙ୍କ ସାଥୀଙ୍କୁ ଅପମାନ କରିବା ଅଭିଯୋଗରେ ଦୋଷୀ ସାବ୍ୟସ୍ତ କରିଛନ୍ତି।
କୋର୍ଟ ଅଧିକାରୀ କହିଛନ୍ତି ଯେ ଦୋଷୀମାନେ ଚାରୋଟି ଭିନ୍ନ ଭିନ୍ନ ଆଇଡି ବ୍ୟବହାର କରି ଫେସବୁକରେ ଈଶ୍ୱର ନିନ୍ଦା ବିଷୟବସ୍ତୁ ଅପଲୋଡ କରିଥିଲେ। ଅଧିକାରୀ କହିଛନ୍ତି, “ବିଚାରପତି ଉଭୟଙ୍କ ଯୁକ୍ତି ଏବଂ ସାକ୍ଷୀଙ୍କ ବୟାନ ଶୁଣିବା ପରେ ବିଚାରପତି ପ୍ରତ୍ୟେକଙ୍କୁ ପୃଥକ ପୃଥକ ମାମଲାରେ ମୃତ୍ୟୁଦଣ୍ଡ ସହିତ ୮୦ ବର୍ଷ ଜେଲଦଣ୍ଡ ଦେଇଛନ୍ତି। ଦୋଷୀମାନଙ୍କ ବିରୁଦ୍ଧରେ ୫୨ ଲକ୍ଷ ପାକିସ୍ତାନୀ ଟଙ୍କା ଜରିମାନା ମଧ୍ୟ ଲାଗୁ କରାଯାଇଛି।
