ବିଭିନ୍ନ ସହରକୁ ବିମାନ ଚଳାଚଳ ବନ୍ଦ କଲେ ଏୟାର୍ ଇଣ୍ଡିଆ ଓ ଇଣ୍ଡିଗୋ
ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନା ମଧ୍ୟରେ ସୁରକ୍ଷାକୁ ଦୃଷ୍ଟିରେ ରଖି ଇଣ୍ଡିଗୋ ଏବଂ ଏୟାର ଇଣ୍ଡିଆ ମେ ୧୩ ପାଇଁ ଉତ୍ତର ଏବଂ ପଶ୍ଚିମ ଭାରତର ଅନେକ ସହରକୁ ବିମାନ ଚଳାଚଳ ସ୍ଥଗିତ ରଖିଛନ୍ତି। କାରଣ ଗତକାଲି ରାତିରେ ପାକିସ୍ତାନ ପୁଣି ଥରେ ସୀମାରେ ଡ୍ରୋନ୍ ଛାଡ଼ିଥିବା ରିପୋର୍ଟ ହୋଇଛି।
ଇଣ୍ଡିଗୋ ଶନିବାର ରାତି ୧୧:୫୯ ପର୍ଯ୍ୟନ୍ତ ଶ୍ରୀନଗର, ଜମ୍ମୁ, ଅମୃତସର, ଲେହ, ଚଣ୍ଡିଗଡ଼ ଏବଂ ରାଜକୋଟକୁ ସମସ୍ତ ବିମାନ ଚଳାଚଳ ବାତିଲ କରିଛି।ଏକ ବିବୃତି ଜାରି କରି ବିମାନ କମ୍ପାନୀ ଇଣ୍ଡିଗୋ କହିଛି, “ଏହା କିପରି ଆପଣଙ୍କ ଯାତ୍ରା ଯୋଜନାକୁ ବାଧା ଦେଇପାରେ ତାହା ଆମେ ବୁଝିପାରୁଛୁ। ଅସୁବିଧା ପାଇଁ ଆମେ ଦୁଃଖିତ। ଆମରଟିମ୍ ସକ୍ରିୟ ଭାବରେ ପରିସ୍ଥିତି ଉପରେ ନଜର ରଖିଛନ୍ତି ଏବଂ ଆପଣଙ୍କୁ ପରବର୍ତ୍ତୀ ଅପଡେଟ୍ ବିଷୟରେ ତୁରନ୍ତ ସୂଚନା ଦେବେ।”
ସେହିପରି ଏୟାର ଇଣ୍ଡିଆ ଜମ୍ମୁ, ଲେହ, ଯୋଧପୁର, ଅମୃତସର, ଭୁଜ, ଜାମନଗର, ଚଣ୍ଡିଗଡ଼ ଏବଂ ରାଜକୋଟକୁ ଦୁଇ-ପାଖ ବିମାନ ବାତିଲ କରିବାର ଘୋଷଣା ମଧ୍ୟ କରିଛି।ଏୟାରଲାଇନ୍ସ ଏକ୍ସରେ ଅପଡେଟ୍ ସେୟାର କରି କହିଛି, ସାଂପ୍ରତିକ ସ୍ଥିତିକୁ ଦୃଷ୍ଟିରେ ରଖି ଏବଂ ଆପଣଙ୍କ ସୁରକ୍ଷାକୁ ଧ୍ୟାନରେ ରଖି, ମଙ୍ଗଳବାର (୧୩ ମେ) ପାଇଁ ଜମ୍ମୁ, ଲେହ, ଯୋଧପୁର, ଅମୃତସର, ଭୁଜ, ଜାମନଗର, ଚଣ୍ଡିଗଡ଼ ଏବଂ ରାଜକୋଟକୁ ବିମାନ ଚଳାଚଳ ବାତିଲ କରାଯାଇଛି। ଆମେ ପରିସ୍ଥିତି ଉପରେ ନଜର ରଖୁଛୁ ଏବଂ ଆପଣଙ୍କୁ ଅପଡେଟ୍ ରଖିବୁ।” ସୋମବାର ସନ୍ଧ୍ୟାରେ ସମ୍ବାଦ ସଂସ୍ଥା ପିଟିଆଇ ରିପୋର୍ଟ ଅନୁଯାୟୀ, ଅମୃତସରରେ ସତର୍କତାମୂଳକ ବ୍ଲାକଆଉଟ୍ ବ୍ୟବସ୍ଥା ଲାଗୁ କରାଯିବା ପରେ ଅମୃତସର ଅଭିମୁଖେ ଯାଉଥିବା ଏକ ଇଣ୍ଡିଗୋ ବିମାନ ଦିଲ୍ଲୀ ଫେରି ଆସିଥିଲା।
ସାମ୍ବା, ଅଖନୁର, ଜୈସଲମେର ଏବଂ କାଠୁଆରେ ଡ୍ରୋନ୍ ଦେଖାଯିବା ପରେ ଏୟାରଲାଇନ୍ସ ଦ୍ୱାରା ଏହି କାର୍ଯ୍ୟାନୁଷ୍ଠାନ ନିଆଯାଇଛି। ତଥାପି, ଭାରତୀୟ ସେନା ମଙ୍ଗଳବାର ସ୍ପଷ୍ଟ କରିଛି ଯେ ସମ୍ପ୍ରତି କୌଣସି ଡ୍ରୋନ୍ କାର୍ଯ୍ୟକଳାପ ଚିହ୍ନଟ ହୋଇନାହିଁ ଏବଂ ଯୁଦ୍ଧବିରତି ଅକ୍ଷୁର୍ଣ୍ଣ ରହିଛି।
