କୀର୍ତ୍ତନ ସାରି ଫେରିବାବେଳେ ଦୁର୍ଘଟଣା: ଚାଲିଗଲା ୬ ଜୀବନ
ସୁନ୍ଦରଗଡ଼: ସୁନ୍ଦରଗଡ଼ ଜିଲ୍ଲା ହେମଗିରି ଥାନା ଅନ୍ତର୍ଗତ ଗଏକାନପାଲି ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଟ୍ରଲର ପଛପଟେ ପିଟିହେଲା ଟାଟା ମ୍ୟାଜିକ୍ । ଚାଲିଗଲା ୬ ଜଣଙ୍କ ଜୀବନ । ୫ ଜଣ ହୋଇଛନ୍ତି ଗୁରୁତର । କୀର୍ତ୍ତନ ସାରି ଫେରୁଥିବାବେଳେ ଘଟିଛି ଏହି ବଡ଼ ଦୁର୍ଘଟଣା ।
ହେମଗିରି ଥାନା ଅନ୍ତର୍ଗତ ଗଏକନପାଲି ଗାଁ ନିକଟରେ ରହିଛି ଚକାପାଲି ଗାଁ । ଏହି ଗାଁରେ ଜଣଙ୍କ ଘରେ କୀର୍ତ୍ତନ କରିବାକୁ ଆସିଥିଲେ ଏକ ସଂକୀର୍ତ୍ତନ ଦଳ । ସଂକୀର୍ତ୍ତନ ସାରି ଆଜି ସକାଳୁ ଏକ ଟାଟା ମ୍ୟାଜିକରେ ଘରକୁ ଫେରୁଥିଲେ ସମସ୍ତେ । ଗଏକନପାଲି ରାସ୍ତା କଡ଼ରେଏକ କୋଇଲା ବୋଝଇ ଟ୍ରଲର ଛିଡା ହୋଇଥିଲା । ଭାରସାମ୍ୟ ହରାଇ ଟ୍ରଲର ପଛପଟେ ପିଟି ହୋଇଥିଲା ଟାଟା ମ୍ୟାଜିକ୍। ଫଳରେ ଘଟଣାସ୍ଥଳରେ ୬ ଜଣଙ୍କ ମୃତ୍ୟୁ ହୋଇଥିବା ବେଳେ ୫ ଜଣ ଗୁରୁତର ହୋଇଛନ୍ତି । ସେମାନଙ୍କୁ ସ୍ଥାନୀୟ ହସପିଟାଲରେ ଭର୍ତ୍ତି କରାଯାଇଛି । ଦୁର୍ଘଟଣା ପରେ କ୍ଷତିପୂରଣ ଦାବିରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା । ଘନ କୁହୁଡ଼ି ଯୋଗୁ ଏହି ଦୁର୍ଘଟଣା ଘଟିଥିବା ସନ୍ଦେହ କରାଯାଉଛି।
