ସୀମା ଏବେ ଭାରତର ବୋହୂ, ତାଙ୍କୁ ପାକିସ୍ତାନ ପଠାଅ ନାହିଁ: ରାଖୀ ସାୱନ୍ତ
ଶ୍ରୀନଗର: ପହଲଗାମ୍ ଆତଙ୍କବାଦୀ ଆକ୍ରମଣ ପରେ, ସମଗ୍ର ଦେଶ କ୍ରୋଧରେ ଜଳୁଛି ଏବଂ ପାକିସ୍ତାନକୁ ଉଚିତ୍ ଶିକ୍ଷା ଦେବାକୁ ଦାବି କରୁଛି। ଏହି ସମୟରେ, ଭାରତ ସରକାର ଏକ ବଡ଼ ପଦକ୍ଷେପ ନେଇ ପାକିସ୍ତାନୀମାନଙ୍କୁ ଦେଶ ଛାଡିବାକୁ କହିଛନ୍ତି। ଏପରି ପରିସ୍ଥିତିରେ ବେଆଇନ୍ ଭାବେ ଭାରତ ଆସିଥିବା ସୀମା ହାଇଦର ଭାରତରେ ରହିବା ଉପରେ ପ୍ରଶ୍ନ ଉଠିଛି। ସୀମା ୨୦୨୩ ମସିହାରେ ଭାରତରେ ଅବୈଧ ଭାବରେ ପ୍ରବେଶ କରିଥିଲେ ଏବଂ ଗ୍ରେଟର ନୋଏଡାର ରାବୁପୁରାର ୨୪ବର୍ଷୀୟ ସଚିନ ମୀନାଙ୍କୁ ବିବାହ କରିଥିଲେ। ନିକଟରେ ସଚିନ ଏବଂ ସୀମା ଏକ କନ୍ୟା ସନ୍ତାନର ପିତାମାତା ହୋଇଛନ୍ତି। ଏବେ ଯେତେବେଳେ ସୀମା ହାଇଦରଙ୍କ ଭାରତରେ ରହିବା ଉପରେ ପ୍ରଶ୍ନ ଉଠାଯାଉଛି, ବଲିଉଡର ଡ୍ରାମା କୁଇନ୍ ରାଖୀ ସାୱନ୍ତ ତାଙ୍କ ସମର୍ଥନରେ ବାହାରିଛନ୍ତି।
ସେ କହିଛନ୍ତି ଯେ, “ସୀମା ହାଇଦରଙ୍କୁ ପାକିସ୍ତାନ ପଠାଯିବା ଉଚିତ୍ ନୁହେଁ। କାରଣ ସେ ଏବେ ଭାରତର ବୋହୂ। ସେ ସଚିନଙ୍କ ସ୍ତ୍ରୀ ଏବଂ ତାଙ୍କ ପିଲାର ମାଆ। ଭାରତ ସୀମା ହାଇଦରଙ୍କୁ ପାକିସ୍ତାନ ପଠାଇବା ଉଚିତ୍ ନୁହେଁ। ସେ ସଚିନଙ୍କୁ ଭଲ ପାଆନ୍ତି ଏବଂ ସେ ସଚିନଙ୍କ ପିଲାର ମାଆ ହୋଇଥିବାରୁ ସେ ଭାରତୀୟ ହୋଇସାରିଛନ୍ତି। କୌଣସି ମହିଳାଙ୍କ ପ୍ରତି ଏପରି ଅନ୍ୟାୟ କରାଯିବା ଉଚିତ୍ ନୁହେଁ। ଯଦି ସେ ମା’ ହୋଇ ନଥାନ୍ତେ, ତେବେ ଆପଣ ତାଙ୍କୁ ପଠାଇପାରିଥାନ୍ତେ। କିନ୍ତୁ ଏବେ ସେ ଭାରତର ବୋହୂ, ତେଣୁ ଆପଣ ସୀମା ହାଇଦରଙ୍କ ସହିତ ଏପରି ଭୁଲ କାମ କରିପାରିବେ ନାହିଁ। ଆପଣ ତାଙ୍କ ସହିତ ଖରାପ ବ୍ୟବହାର କରିପାରିବେ ନାହିଁ। ମହିଳାମାନଙ୍କୁ ସମ୍ମାନ କରନ୍ତୁ। “
