ମହାକୁମ୍ଭରେ ବୁଡ଼ ପକାଇଲେ ମୋଦି ; ରୁଦ୍ରାକ୍ଷ ଧରି ଜପିଲେ ମନ୍ତ୍ର
ପ୍ରୟାଗରାଜ: ତ୍ରିବେଣୀ ସଙ୍ଗମରେ ବୁଡ଼ ପକାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହାପରେ ସେ ଗଙ୍ଗା ପୂଜା କରିଥିଲେ । ପ୍ରଧାନମନ୍ତ୍ରୀ ପ୍ରୟାଗରାଜରେ ପହଞ୍ଚିବା ପରେ ନୌକାବିହାର କରି ବୁଲି ଦେଖିବା ପରେ ବୁଡ଼ ପକାଇଥିଲେ । ତାଙ୍କ ସହ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବି ଥିଲେ । ପ୍ରଧାନମନ୍ତ୍ରୀ ତ୍ରିବେଣୀ ସଂଗମରେ ବୁଡ଼ ପକାଇବା ପରେ ଆଣ୍ଠୁଏ ପାଣିରେ ପଶି ରୁଦ୍ରାକ୍ଷ ମାଳା ଧରି ମନ୍ତ୍ର ଜପ କରିଥିଲେ । ପରେ ଗଙ୍ଗା ପୂଜା କରିବା ସହ ଆଖଡ଼ାରେ ସାଧୁସନ୍ଥଙ୍କୁ ଭେଟିଥିଲେ । ମୋଦିଙ୍କ ଗସ୍ତ ପାଇଁ ସଙ୍ଗମସ୍ଥଳରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।
ମୌନୀ ଅମାବାସ୍ୟା ଅମୃତ ସ୍ନାନ ସମୟରେ ମହାକୁମ୍ଭରେ ଦଳାଚକଟାରେ ୩୦ ଜଣଙ୍କ ମୃତ୍ୟୁ ଘଟିବାର କିଛି ଦିନ ପରେ ମୋଦି ବୁଡ଼ ପକାଇବାକୁ ଯାଇ ପହଞ୍ଚିଛନ୍ତି। ବୁଧବାର ଦିଲ୍ଲୀରେ ନିର୍ବାଚନ ଚାଲିଥିବା ବେଳେ ପ୍ରଧାନମନ୍ତ୍ରୀ ମହାକୁମ୍ଭରେ ବୁଡ଼ ପକାଇଛନ୍ତି । ଅନେକ ହିନ୍ଦୁ ଧାର୍ମିକ ପରମ୍ପରା ଓ ଐତିହାସିକ ଘଟଣା ସହିତ ଜଡିତ ମାଘ ଅଷ୍ଟମୀ ଓ ଭୀଷ୍ମ ଅଷ୍ଟମୀ ପାଳନ କରନ୍ତି। ମାଘ ଅଷ୍ଟମୀରେ ପ୍ରୟାଗରାଜର ତ୍ରିବେଣୀ ସଙ୍ଗମରେ ଅନେକ ଲୋକ ସ୍ନାନ, ଭିକ୍ଷା ଅର୍ପଣ ଓ ଧ୍ୟାନ ପାଇଁ ଏକାଠି ହୁଅନ୍ତି। ଧାର୍ମିକ ପରମ୍ପରା ଦ୍ୱାରା ପରିଚିତ ଗୁପ୍ତ ନବରାତ୍ରି ସହିତ ମଧ୍ୟ ଏହି ଦିବସ ପାଳନ କରାଯାଏ। ଭୀଷ୍ମ ଅଷ୍ଟମୀ ମହାଭାରତର ଭୀଷ୍ମ ପିତାମହଙ୍କ ସ୍ମୃତିରେ ପାଳନ କରାଯାଏ। ସୂର୍ଯ୍ୟ ଉତ୍ତରାୟଣ ଓ ଶୁକ୍ଳପକ୍ଷକୁ ଯିବା ପର୍ଯ୍ୟନ୍ତ ସେ ଶରଶଯ୍ୟାରେ ରହିଥିଲେ। ଏହି ମାଘ ଶୁକ୍ଳ ଅଷ୍ଟମୀ ଦିନ ସେ ଦେହତ୍ୟାଗ କରିଥିଲେ। ତେଣୁ ଏହିଦିନ ପବିତ୍ର ନଦୀରେ ସ୍ନାନ କରି ଭୀଷ୍ମଙ୍କୁ ତିଳତର୍ପଣ ଓ ପିଣ୍ଡଦାନ କରାଯାଏ।
