ବିସିସିଆଇ ନିର୍ଦ୍ଦେଶ : ଘରୋଇ ଟୁର୍ନାମେଣ୍ଟ ନ ଖେଳିଲେ ଭୋଗିବାକୁ ପଡିବ ପରିଣାମ
ନୂଆଦିଲ୍ଲୀ: ଟିମ ଇଣ୍ଡିଆର ଅନେକ ବରିଷ୍ଠ ଖେଳାଳି ଖରାପ ଫର୍ମ ଦେଇ ଗତି କରୁଛନ୍ତି। ଏନେଇ ରୋହିତ ଶର୍ମା ଏବଂ ବିରାଟ କୋହଲିଙ୍କୁ ସବୁଠାରୁ ଅଧିକ ସମାଲୋଚନା କରାଯାଉଛି। କିମ୍ବଦନ୍ତୀ କ୍ରିକେଟରଙ୍କଠାରୁ ଆରମ୍ଭ କରି ପ୍ରଶଂସକ ପର୍ଯ୍ୟନ୍ତ, ସମସ୍ତେ ତାଙ୍କୁ ଘରୋଇ କ୍ରିକେଟ ଖେଳିବାକୁ ପରାମର୍ଶ ଦେଉଛନ୍ତି। ବରିଷ୍ଠ ଖେଳାଳିମାନଙ୍କୁ ରଣଜୀ ଟ୍ରଫିର ଦ୍ୱିତୀୟ ପର୍ଯ୍ୟାୟର ପ୍ରଥମ ମ୍ୟାଚ ଖେଳିବାକୁ ବିସିସିଆଇ ପରାମର୍ଶ ଦେଇଛି ।
ଆସନ୍ତା ୨୩ ତାରିଖରୁ ଆରମ୍ଭ ହେବ ଘରୋଇ ଟୁର୍ନାମେଣ୍ଟ । ଏଥିଲାଗି ସମସ୍ତଙ୍କ ନଜର ରୋହିତ ଶର୍ମା, ବିରାଟ କୋହଲି ଏବଂ ଅନ୍ୟାନ୍ୟ ବରିଷ୍ଠ ଖେଳାଳିଙ୍କ ଉପରେ ରହିବ। ଯଦିଓ ଏହା ବାଧ୍ୟତାମୂଳକ ନୁହେଁ, ବିସିସିଆଇ ସ୍ପଷ୍ଟ କରିଛି ଯେ, ଘରୋଇ କ୍ରିକେଟକୁ ଅଣଦେଖା କରିବା ତାଙ୍କ କ୍ୟାରିୟରକୁ ପ୍ରଭାବିତ କରିପାରେ। ବିସିସିଆଇ ଖେଳାଳିମାନଙ୍କୁ ରଣଜୀ ଟ୍ରଫି ଖେଳିବାକୁ ପରାମର୍ଶ ଦେଇଛି।
ଖେଳାଳିମାନେ ଘରୋଇ କ୍ରିକେଟ ଖେଳି ସେମାନଙ୍କର କୌଶଳକୁ ଉନ୍ନତ କରିବା ଉଚିତ୍ । ଟିମ ଇଣ୍ଡିଆ ପାଇଁ ଭଲ ପ୍ରଦର୍ଶନ କରିବାକୁ ପ୍ରସ୍ତୁତ ହେବା ଉଚିତ୍। ବିସିସିଆଇର ଏକ ସୂତ୍ର ଅନୁସାରେ, ଘରୋଇ କ୍ରିକେଟ ଖେଳିବା ଜରୁରୀ। ଯଦିଓ ଏହା ବାଧ୍ୟତାମୂଳକ ନୁହେଁ, ଖେଳାଳିମାନଙ୍କୁ ଏହି ବାର୍ତ୍ତା ଦିଆଯାଇଛି ଯେ ଚୟନକର୍ତ୍ତାମାନେ ସେମାନଙ୍କ ଉପଲବ୍ଧତା ଆଧାରରେ ପରବର୍ତ୍ତୀ ନିଷ୍ପତ୍ତି ନେବେ। ଯଦି ଖେଳାଳିମାନେ ଏହାକୁ ଅଣଦେଖା କରନ୍ତି, ତେବେ ସେମାନଙ୍କୁ ପରିଣାମ ଭୋଗିବାକୁ ପଡିବ।
