ଅମିରଙ୍କ ଡ୍ରିମ୍ ପ୍ରୋଜେକ୍ଟ: କରିବେ ‘ମହାଭାରତ’କୁ ନେଇ ଫିଲ୍ମ
ମୁମ୍ବାଇ: ସିନେପ୍ରେମୀଙ୍କ ପାଇଁ ଖୁସି ଖବର । ବଡ଼ ପରଦାରେ ଆସିବ ମହାଭାରତ । ପୌରାଣିକ ଗ୍ରନ୍ଥ ‘ମହାଭାରତ’କୁ ନେଇ ନିର୍ମାଣ ହେବ ଫିଲ୍ମ । ତାହାପୁଣି ହାଇ ବଜେଟରେ । ଏହାକୁ ନିର୍ମାଣ କରିବେ ବଲିଉଡ଼ର ଚକୋଲେଟ୍ ହିରୋ ଅମିର ଖାନ୍ । ଏହା ଜାଣିବା ପରେ ସିନେ ପ୍ରେମୀଙ୍କ ଭିତରେ ଉତ୍ସାହ ଦେଖାଦେଇଛି ।
ଛୋଟ ପରଦାରେ ପ୍ରସାରିତ ହେଉଥିବା ମହାଭାରତ ବେଶ୍ ଲୋକପ୍ରିୟ ଥିଲା । ଏହି ଧାରାବାହିକର ପ୍ରତ୍ୟେକ ଚରିତ୍ର ଘରେ ଘରେ ବେଶ୍ ପରିଚିତ ହୋଇପାରିଥିଲେ । ଧାରାବାହିକର ଲୋକପ୍ରିୟତାକୁ ନଜର ରଖି ଏହାକୁ ବଡ଼ ପରଦାକୁ ଆଣିବା ପାଇଁ ଅଭିନେତା ଅମିର ଖାନ୍ ଅଣ୍ଟା ଭିଡ଼ିଛନ୍ତି । ଏହି ଫିଲ୍ମ ତାଙ୍କର ଏକ ଡ୍ରିମ ପ୍ରୋଜେକ୍ଟ ବୋଲି କହିଛନ୍ତି ଅମିର ଖାନ୍ । ବଲିଉଡର ନାମୀ ଦାମୀ ଅଭିନେତା-ଅଭିନେତ୍ରୀଙ୍କୁ ନେଇ ଏହି ଫିଲ୍ମ ନିର୍ମାଣ କରିବା ପାଇଁ ଅମୀର ଖାନ୍ ଇଚ୍ଛା ରଖିଛନ୍ତି ।
ଅମିର କହିଛନ୍ତି , ଏହା ମୋର ଡ୍ରିମ୍ ପ୍ରୋଜେକ୍ଟ । ଏହାକୁ ସୂଚାରୁରୂପେ କରିବା ପାଇଁ ଚେଷ୍ଟା କରିବି । ମୋ ମନରେ ଭୟ ବି ରହିଛି, କାହିଁ କେଉଁଠି ଭୁଲ ନ ହେଉ । ଏହା ମୋ ପାଇଁ ବଡ଼ ଦାୟିତ୍ୱ । କାରଣ ‘ମହାଭାରତ’ ସବୁ ଭାରତୀୟଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ନେଇଛି । ଏହା ଆମର ରକ୍ତରେ ରହିଛି । ଏଥିପାଇଁ ମୁଁ ଏହା ଉପରେ ଫିଲ୍ମ ତିଆରି କରିବାକୁ ଇଛା ରଖିଛିି । ମୁଁ ପ୍ରତି ଭାରତୀୟଙ୍କୁ ଗର୍ବ ଅନୁଭବ କରିବାକୁ ଚାହୁଁଛି । ମୁଁ ଦୁନିଆକୁ ଦେଖାଇବାକୁ ଚାହୁଁଛି କି ଦେଖ ! ଭାରତ ପାଖରେ କ’ଣ ଅଛି । ମୁଁ ଏହା ଉପରେ ହୃଦୟତାର ସହ କାମ କରିବାକୁ ଚାହୁଁଛି । ଖୁବ୍ଶୀଘ୍ର ଏହାର ସୁଟିଂ ଆରମ୍ଭ ହେବ ବୋଲି କହିଛନ୍ତି ଅମିର ।
ଅମିରଙ୍କ ଅପକମିଂ ଫିଲ୍ମ ବିଷୟରେ କହିବା ତ, ତାଙ୍କର ଆଗାମୀ ଫିଲ୍ମ ସିତାରେ ଜମିନ୍ ପରର ସୁଟିଂ ଶେଷ ହୋଇଛି ।ଏବେ ସୁଦ୍ଧା ଫିଲ୍ମର ରିଲିଜ ତାରିଖ ଘୋଷଣା ହୋଇ ନାହିଁ , କିନ୍ତୁ କୁହାଯାଉଛି କି ଏହି ଫିଲ୍ମ ଖୁବ୍ଶୀଘ୍ର ପରଦା ଉପରକୁ ଆସିବ । ଅଭିନେତା, ନିର୍ଦ୍ଦେଶକ ତଥା ପ୍ରଯୋଜକ ଅମିର ଏବେ ‘ଲାପତା ଲେଡିଜ୍’ର ପ୍ରମୋସନରେ ବ୍ୟସ୍ତ ଅଛନ୍ତି । ଆମିରଙ୍କ ପ୍ରଡକ୍ସନରେ ନିର୍ମିତ ଏହି ଫିଲ୍ମ ‘ଲାପତା ଲେଡିଜ୍’ ଓସ୍କାରରୁ ବାଦ୍ ପଡ଼ିଛି ।
