ନୂଆଦିଲ୍ଲୀରୁ କେଜ୍ରିୱାଲ , କାଲକାଜୀରୁ ଅତିଶି ଲଢିବେ ନିର୍ବାଚନ
ନୂଆଦିଲ୍ଲୀ: ଆମ୍ ଆଦମୀ ପାର୍ଟି ଆଜି ତାହାର ଚତୁର୍ଥ ତଥା ଅନ୍ତିମ ପ୍ରାର୍ଥୀ ତାଲିକା ପ୍ରକାଶ କରିଛି। ଆପ୍ ୩୮ ଜଣ ପ୍ରାର୍ଥୀଙ୍କ ତାଲିକା ପ୍ରକାଶ କରିଛି । ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ତଥା ପାର୍ଟି ସଂଯୋଜକ ଅରବିନ୍ଦ କେଜ୍ରିୱାଲ ତାଙ୍କ ପାରମ୍ପରିକ ନୂଆଦିଲ୍ଲୀ ଆସନରୁ ଏଥର ପ୍ରତିଦ୍ୱନ୍ଦ୍ୱିତା କରିବେ । ସେହିପରି ମୁଖ୍ୟମନ୍ତ୍ରୀ ଅତିଶି କାଲକାଜୀରୁ ପ୍ରତିଦ୍ୱନ୍ଦ୍ୱିତା କରିବେ। ମନ୍ତ୍ରୀ ସୌରଭ ଭରଦ୍ୱାଜଙ୍କୁ ଗ୍ରେଟର କୈଳାସ ଏବଂ ଗୋପାଳ ରାୟଙ୍କୁ ବାବରପୁରରୁ ପ୍ରାର୍ଥୀ କରାଯାଇଛି। ଅରବିନ୍ଦ କେଜ୍ରିୱାଲଙ୍କ ନେତୃତ୍ୱାଧୀନ ଆପର ଅନ୍ତିମ ତାଲିକାରେ ଅଧିକାଂଶ ନାମ ହେଉଛି ଯେଉଁମାନେ ୨୦୨୦ ବିଧାନସଭା ନିର୍ବାଚନରେ ଜିତିଥିଲେ । ଏହା ପୁନର୍ବାର ବିଧାୟକମାନଙ୍କୁ ଟିକେଟ୍ ଦେଇଛି।
ଅନ୍ୟପଟେ ମୁଖ୍ୟମନ୍ତ୍ରୀ ଅତିଶି, କ୍ୟାବିନେଟ ମନ୍ତ୍ରୀ ସୌରଭ ଭରଦ୍ୱାଜ, ଇମ୍ରାନ ହୁସେନ୍, ଗୋପାଳ ରାୟ ଏବଂ ମୁକେଶ କୁମାର ଅହଲୱାଟଙ୍କୁ ପୁଣି ଟିକେଟ୍ ଦିଆଯାଇଛି । ଏହା ବ୍ୟତୀତ ଆପ ଦଳର ବଡ ଚେହେରା ସୋମନାଥ ଭାରତୀ, ଦୁର୍ଗେଶ ପାଠକ ଏବଂ ଅମାନତୁଲ୍ଲା ଖାନଙ୍କୁ ମଧ୍ୟ ପୁଣି ଟିକେଟ ଦିଆଯାଇଛି । ୩୮ ଜଣ ପ୍ରାର୍ଥୀଙ୍କ ତାଲିକାରେ ଆଶ୍ଚର୍ଯ୍ୟଜନକ ନାମ ହେଉଛି ଅରବିନ୍ଦ କେଜ୍ରିୱାଲଙ୍କ ଉପସ୍ଥିତିରେ ଆଜି ଆପରେ ଯୋଗ ଦେଇଥିବା ରମେଶ ପେହଲୱାନଙ୍କ ନାମ।
କସ୍ତୁରବା ନଗରରୁ ରମେଶ ପେହଲୱାନଙ୍କୁ ଟିକେଟ ଦିଆଯାଇଛି। ରମେଶଙ୍କ ପତ୍ନୀ କୁସୁମଲତା ଜଣେ କାଉନସିଲର। କୁସୁମଲତା ମଧ୍ୟ ଆପରେ ଯୋଗ ଦେଇଛନ୍ତି । ଉଭୟ ସ୍ୱାମୀ ଏବଂ ସ୍ତ୍ରୀ ୨୦୧୭ରେ ଆପ ଛାଡିଥିଲେ ଏବଂ ୭ ବର୍ଷର ବ୍ୟବଧାନ ପରେ ପୁଣି ଆପରେ ଯୋଗ ଦେଇଛନ୍ତି । ଉଲ୍ଲେଖ ଥାଉ କି ୨୦୨୫ ବର୍ଷ ଆରମ୍ଭରେ ଦିଲ୍ଲୀରେ ବିଧାନସଭା ନିର୍ବାଚନ ହୋଇପାରେ । ଆଉ ବିଜେପି ଓ ଆମ ଆଦମୀ ପାର୍ଟି ମଧ୍ୟରେ କଡା ଟକ୍କର ହୋଇପାରେ ବୋଲି ରାଜନୈତିକ ବିଶେଷଜ୍ଞନମାନେ ଆକଳନ କରୁଛନ୍ତି ।
