ଜବରଦସ୍ତ ମନୋରଞ୍ଜନ ଧମାକା ନେଇ ଆସୁଛି ନୂଆ ଫିଲ୍ମ “ଜବରଦସ୍ତ ଜ୍ୱାଇଁ’
ଭୁବନେଶ୍ୱର : ଆସନ୍ତା ୨୦ ତାରିଖ ସନ୍ଧ୍ୟା ୬ ଟା ୩୦ରେ ମୁକ୍ତିଲାଭ କରିବାକୁ ଯାଉଛି ହାସ୍ୟରସାତ୍ମକ ମନୋରଞ୍ଜନଧର୍ମୀ ଓଡ଼ିଆ ସିନେମା “ଜବରଦସ୍ତ ଜ୍ୱାଇଁ”। ଏହି ସିନମାର ପ୍ରଯୋଜକ ଅଛନ୍ତି କବୀର ଦାସ । ଏହାକୁ ନିର୍ଦ୍ଦେଶନା ଦେଇଛନ୍ତି ଅଶୋକ ପତି ଓ ସଂଗୀତ ନିର୍ଦ୍ଦେଶନା ଦେଇଛନ୍ତି ବୈଦ୍ୟନାଥ ଦାଶ । ନିକଟରେ ଏକ ଘରୋଇ ହୋଟେଲରେ ଏହି ସିନେମାର ଅଡିଓ ଲୋକାର୍ପଣ କାର୍ଯ୍ୟକ୍ରମ ଆୟୋଜିତ ହୋଇଯାଇଛି ହୋଇଯାଇଛି।
ବାଲେଶ୍ୱରର ଏକ ଛୋଟିଆ ସ୍ଥାନରୁ ଚାକିରୀ ପାଇଁ ଆସି ସଂଘର୍ଷ କରୁଥିବା ଯୁବକ ପ୍ରଭାତର କାହାଣୀ ଉପରେ ଏହି ସିନେମା। ଅର୍ଥ ବାଧକ ସାଜିବାରୁ ଘରୁ ପାଦ କାଢ଼ି ରାଜଧାନୀ ଭୁବନେଶ୍ୱର ଆସିଛି କାମ ପାଇଁ। କାମ ମିଳିଛି ; କିନ୍ତୁ ଏହା ସହ ଦୁଇ ଜଣ ଅବୁଝା ମାଲିକ ପାଖରେ ରହିବା ନେଇ କାହାଣୀ ଗତିଶୀଳ। ଉଭୟ ମାଲିକ ପ୍ରଭାତକୁ ପସନ୍ଦ କରିବା ସହିତ ନିଜ ଝିଅର ବାହାଘର ତାଙ୍କ ସହିତ କରିବେ ବୋଲି ମନେ ମନେ ସ୍ଥିର କରିସାରିଛନ୍ତି । ଏପଟେ ଉଭୟ ଘର ମାଲିକକୁ ଓ ମାଲିକଙ୍କ ଝିଅକୁ ଖୁସିରେ କେମିତି ସବୁବେଳେ ରଖିବ ଏହାକୁ ନେଇ ପରିସ୍ଥିତିର ଦୋ ଛକିରେ ଫସି ଯାଇଛି ପ୍ରଭାତ।
ଏହି ଦୁହିଁଙ୍କ ନିଷ୍ପତ୍ତି ଭିତରେ ବିଭିନ୍ନ ପରିସ୍ଥିତି ସାମ୍ନାକୁ ଆସିବା ଯୋଗୁଁ ଉଭୟଙ୍କ ମଧ୍ୟରେ ଗଢ଼ିଉଠିଛି ପ୍ରେମ ସମ୍ପର୍କ। ଆଗକୁ କାହାଣୀରେ କ’ଣ ହେବ? ଦୁଇ ମାଲିକଙ୍କ ଝିଅ ମଧ୍ୟରୁ ପ୍ରଭାତ କାହାକୁ ଚୟନ କରିବେ?? ଏ ସବୁର ଉତ୍ତର ସ୍ପଷ୍ଟ ହେବ ଅକ୍ଟୋବର ୨୦ ତାରିଖ ରବିବାର ସନ୍ଧ୍ୟା ୬:୩୦ରେ ନୂଆ ଓଡ଼ିଆ ଚଳଚ୍ଚିତ୍ର ‘ଜବରଦସ୍ତ ଜ୍ୱାଇଁ ‘ କେବଳ ଜୀ ସାର୍ଥକରେ। ପୂର୍ବରୁ ସବୁ ଫିଲ୍ମ ଯେମିତି ଦର୍ଶକଙ୍କୁ ମନୋରଞ୍ଜନ ଦେଇଆସିଛି ଏହି ଫିଲ୍ମ ତା’ ଠାରୁ ଅଧିକ ଓ ଅଲଗା ମନୋରଞ୍ଜନ ଯୋଗାଇବ ବୋଲି କହିଛନ୍ତି ଜୀ ସାର୍ଥକର ଚିଫ ଚ୍ୟାନେଲ ଅଧିକାରୀ ପ୍ରତୀକ ସିଲ୍ କହିଛନ୍ତି।
ଓଡିଶାରେ ପରିଚିତ “ଜୀ ସାର୍ଥକ ” ଓଡ଼ିଆ ଚ୍ୟାନେଲ ସବୁବେଳେ ଦର୍ଶକଙ୍କ ପସନ୍ଦକୁ ଗୁରୁତ୍ୱ ଦେଇ ଆସିଛି । ବିଶେଷ କରି ଓଡିଆ ଘରର ପରମ୍ପରା ଓ ରୀତିନୀତିକୁ ନେଇ ତିଆରି କରିଥିବା ଅନେକ ମନୋଲୋଭା ଧାରାବାହିକ ନିଜର ଦର୍ଶକଙ୍କୁ ଭେଟି ଦେଇପାରିଛି।ଏହି ଅଡିଓ ଲୋକାର୍ପଣ ଉତ୍ସବରେ ଜୀ ସାର୍ଥକ ଚାନେଲ ଚିଫ ପ୍ରତୀକ ସିଲ୍, ପ୍ରୋଗ୍ରାମିଂ ମ୍ୟାନେଜର ତନ୍ମୟ ମିଶ୍ର, ନନ୍ ଫିକ୍ସନ ଗ୍ରୁପ ହେଡ଼ ସାଇ କିରଣ ମଙ୍ଗରାଜ, କମରସିଆଲ ହେଡ଼ ଜଗଦୀଶ୍ୱର, ସଙ୍ଗୀତ ନିର୍ଦ୍ଦେଶକ ବୈଦ୍ୟନାଥ ଦାଶ, ଅଭିନେତା ଦୀପନ୍ୱିତ ଦାସ ମହାପାତ୍ର, କେକେ, ଭକ୍ତି, ଜୀବନ ପଣ୍ଡା, ଚୌଧୁରୀ ଜୟ ପ୍ରକାଶ ଦାସ, ଐଶ୍ୱରୀୟା, କଣ୍ଠଶିଳ୍ପୀ ଚିରାଗ ଦୀପ, ଶୀତଲ କବି ପ୍ରମୁଖ ଉପସ୍ଥିତ ଥିଲେ ।
