୬ ବର୍ଷ ପରେ ପୁଣି ଧମାଲ କରିବେ ଜାହ୍ନବୀ-ଇଶାନ
ମୁମ୍ବାଇ: ଦୀର୍ଘ ୬ ବର୍ଷ ପରେ ପରଦାରେ ପୁଣି ଏକାଠି ନଜର ଆସିବେ ବଲିଉଡ଼ ଅଭନେତ୍ରୀ ଜାହ୍ନବୀ କପୁର ଓ ଅଭିନେତା ଇଶାନ ଖଟ୍ଟର । ଉଭୟଙ୍କୁ ଏକ ବଡ଼ ପ୍ରୋଜେକ୍ଟରେ ଏକାଠି ଅଭିନୟ କରୁଥିବାର ଦେଖିବାକୁ ମିଳିବ । ଫିଲ୍ମ ନିର୍ମାତା କରନ୍ ଜୋହରଙ୍କ ଧର୍ମା ପ୍ରଡକ୍ସନର ବ୍ୟାନରରେ ଏହି ଫିଲ୍ମର ନିର୍ମାଣ ହେବ । ଏହାର ନିର୍ଦ୍ଦେଶନା ଦେବେ ନୀରଜ ଘେୱାନ। ଫିଲ୍ମର କାହାଣୀ ୨ ସାଙ୍ଗଙ୍କ ଜୀବନୀ ଉପରେ ଆଧାରିତ ହେବ। ତେବେ ଏହି ଫିଲ୍ମ ଆସନ୍ତା ବର୍ଷ ମୁକ୍ତିଲାଭ କରିବ ।
ଯେତେବେଳେ କରନ୍ ଏବଂ ନୀରଜ ଜାହ୍ନବୀଙ୍କୁ ଏହି ଫିଲ୍ମରେ ଅଭିନୟ କରିବାକୁ ଅଫର ଦେଇଥିଲେ, ସେ ତୁରନ୍ତ ଏହାକୁ ଗ୍ରହଣ କରିଥିଲେ। ଜାହ୍ନବୀ ତାଙ୍କର ପ୍ରଥମ ସହତାରକା ଇଶାନଙ୍କ ସହ ପୁନର୍ବାର କାମ କରିବାକୁ ବେଶ୍ ଉତ୍ସାହିତ ଥିବା କହିଛନ୍ତି । କରନ୍ଙ୍କ ଏହି ପ୍ରୋଜେକ୍ଟରେ ୨ ଜଣ ଅଭିନେତା ମୁଖ୍ୟ ଭୂମିକାରେ ନଜର ଆସିବେ। ଏଥିପାଇଁ ଇଶାନଙ୍କ ସହ ଆଉ ଜଣେ ଅଭିନେତାଙ୍କ ସହ ମଧ୍ୟ ଆଲୋଚନା ଚାଲିଛି। ତେବେ ଉକ୍ତ ଅଭିନେତାଙ୍କ ନାମ ପ୍ରକାଶ ପାଇନାହିଁ। ଅଭିନେତ୍ରୀ ଜାହ୍ନବୀ ଓ ଅଭିନେତା ଇଶାନ ଶେଷ ଥର ପାଇଁ ୨୦୧୮ରେ ଫିଲ୍ମ ନିର୍ମାତା କରଣ ଜୋହରଙ୍କ ‘ଧଡକ୍’ ଫିଲ୍ମରେ ନଜରକୁ ଆସିଥିଲେ।
ସମ୍ପ୍ରତି ଜାହ୍ନବୀ ସାଉଥ୍ ଷ୍ଟାର ଜୁନିୟର ଏନ୍ଟିଆର ଏବଂ ଅଭିନେତା ସୈଫ୍ ଅଲି ଖାନ୍ଙ୍କ ସହ ‘ଦେବରା: ପାର୍ଟ-୧’ର ପ୍ରମୋଶନରେ ବ୍ୟସ୍ତ ଅଛନ୍ତି। ଏହି ଫିଲ୍ମ ସହ ସେ ସାଉଥ୍ ଫିଲ୍ମ ଇଣ୍ଡଷ୍ଟ୍ରିରେ ନିଜର ଡେବ୍ୟୁ କରିବାକୁ ଯାଉଛନ୍ତି। ଫିଲ୍ମଟି ଆସନ୍ତା ୨୭ ତାରିଖରେ ମୁକ୍ତିଲାଭ କରିବ। ସେହିପରି ଇଶାନ ନେଟ୍ ଫ୍ଲିକ୍ସ ସିରିଜ୍ ‘ଦି ପରଫେକ୍ଟ କପଲ୍’ ସହ ହଲିଉଡରେ ଡେବ୍ୟୁ କରିଛନ୍ତି।
