ବାତ୍ୟା ‘ଦାନା’ରେ ଜନ୍ମହେଲେ ୧୬୦୦ ଶିଶୁ

ଭୁବନେଶ୍ୱର: ଗୁରୁବାର ବିଳମ୍ବିତ ରାତିରେ ବାତ୍ୟା ‘ଦାନା’ ଓଡ଼ିଶା ଉପକୂଳ ଛୁଇଁଛି। ଧୀରେ ଧୀରେ ଏହା ଦୁର୍ବଳ ହୋଇଛି। ବାତ୍ୟାକୁ ଦୃଷ୍ଟିରେ ରଖି ଓଡିଶାର ଉପକୂଳବର୍ତ୍ତୀ ଅଞ୍ଚଳରେ ରହୁଥିବା ହଜାର ହଜାର ଲୋକଙ୍କୁ ସ୍ଥାନାନ୍ତର କରାଯାଇଥିଲା। ଏଥିରେ ପ୍ରାୟ ୪୫୦୦ ଗର୍ଭବତୀ ମହିଳା ସାମିଲ ଥିଲେ । ସେମାନଙ୍କ ମଧ୍ୟରୁ ୧,୬୦୦ ମହିଳାଙ୍କର ପ୍ରସବ ହୋଇଥିବା ଜଣାଯାଇଛି । ସମସ୍ତ ମାଆ ଓ ଶିଶୁ ସୁସ୍ଥ ଥିବା ଜଣାଯାଇଛି ।

ବାତ୍ୟା ପୂର୍ବରୁ ମୋଟ ୫୮୪,୮୮୮ ଲୋକଙ୍କୁ ସ୍ଥାନାନ୍ତର କରାଯାଇଥିଲା । ଏମାନଙ୍କୁ ୬,୦୦୮ ବାତ୍ୟା ଆଶ୍ରୟସ୍ଥଳରେ ରଖାଯାଇଛି । ସେମାନଙ୍କୁ ଖାଦ୍ୟ, ଔଷଧ, ଜଳ ଏବଂ ଅନ୍ୟାନ୍ୟ ଆବଶ୍ୟକୀୟ ସାମଗ୍ରୀ ପ୍ରଦାନ କରାଯାଉଛି। ବାଲେଶ୍ୱରରେ ସର୍ବାଧିକ ଲୋକଙ୍କୁ ସ୍ଥାନାନ୍ତର କରାଯାଇଛି । ୧୭୨,୯୧୬ ଜଣ ଲୋକ ସୁରକ୍ଷିତ ସ୍ଥାନକୁ ଅଣାଯାଇଥିଲା । ସେହିପରି ମୟୂରଭଞ୍ଜ ୧୦୦,୦୦୦ ,ଭଦ୍ରକରୁ ଅତିରିକ୍ତ ୭୫,୦୦୦, ଯାଜପୁରରୁ ୫୮,୦୦୦ ଏବଂ କେନ୍ଦୁଝରରୁ ୪୬,୦୦୦ ସ୍ଥାନାନ୍ତର କରାଯାଇଥିଲା ।